Откако започна социјалното дистанцирање и самоизолацијата, можеби си помисливте: Аха, сега кога сум дома може и нема да треба секој ден да запазувам рутина, а и нема да одам надвор на сонце, ни на загадување.
По 2-3 дена, ете ги, нови акни, малку црвенило и освестување дека мора и по дома да се практикува skincare. Од една страна, припишете го тоа на стресот кој секако го имате, признавале или не. Од друга страна, ни дома не ни е 100% стерилно за да не ни се лепат прашинки и нечистотии за кожа.
А и не е само тоа. На пример, затоа што имате резерви на храна, изборот на оброци ви е ограничен, а и како добри и примерни граѓани сигурно не се туркате секој ден за по 2-3 намирници во маркет. Значи, промените во исхраната влијаат врз кожата, а на вас е да се обидете да ги внесувате сите нутритивни состојки кои ви се потребни, витамини, минерали, антиоксиданси и така натаму.
Физичка активност, нешто за кое немавте време, а сега ви фали, нели? Дури и да вежбате дома, сметајте дека сега го немате редовното пешачење до работа, до автобуска, до паркинг, што дури и да ви се чинело како занемарливо, верувајте, било битно за вашето тело. Нормално е кожата да реагира кога се случуваат промени во метаболизмот.
Воздухот дома можеби не ви е загаден со издувни гасови, но во него може да се најдат најразлично честици кои го контаминираат и лицето. Проветрувајте редовно, не дозволувајте да дишете сув и застојан воздух по дома. Не заборавајте ниту на хидратацијата на кожата, редовно ставајте си од хидратантното кремче или серум, што и да користите.
Стресот веќе го спомнавме, а заедно со него доаѓа и анксиозноста, што во овие услови се сосема разбирливи и очекувани, но тоа не значи дека треба да им се дозволи да ве столчат психички и физички.
Значи, да донесеме заклучок, дури и во карантин си важи дека лицето мора да го миете редовно, да го тонирате и да му давате доволно хидратација. Олеснителна околност е тоа што не се шминкате, па од таа страна си ја олеснувате негата значајно.
Мијте лице, мачкајте крема, секако, мијте раце. Да, уште ќе ве потсетувам на тоа.